අධික සීතල විඳ දරාගත හැකි මිනිසා
නෙදර්ලන්ත ජාතිකයෙකු වන විම් හොෆ් නැමැත්තාට අරුම පුදුම හැකියාවක් පිහිටා තිබෙනවා. එනම් සාමාන්‍ය මිනිසෙකුට දරාගත නොහැකි ශීතල පරිසරවල කිසිදු අපහසුතාවයකින් තොරව රැඳීසිටීමේ හැකියාව යි. මේ නිසා අයිස් මිනිසා යන අන්වර්ථ නාමයෙන් ද ඔහුව හඳුන්වනු ලබනවා.
විම් හොෆ්ට ශීතල පිළිබඳ සංවේදන දැනෙන්නේ ඉතාමත් අඩුවෙන්. සාමාන්‍ය මිනිසෙකු මිනිත්තු කිහිපයක් තුළ මරණයට පවා පත්කළ හැකි තරමේ මිදීමට ආසන්න ජලයේ ඔහු අපහසුතාවයක් නොමැතිව පිහිනීම සිදු කරනවා. ඔහුගේ තවත් වික්‍රමාන්විත ක්‍රියාවක් වන්නේ සාමාන්‍ය පාවහන් දෙකක් හා කොට කලිසමක් පමණක් ඇඟලාගෙන එවරස්ට් කන්ද තරණය කරන මාර්ගයේ මීටර 6700ක පමණ උසකට ළඟාවීම යි. හොෆ්ගේ නමට මේ වන විට ලෝක වාර්තා කිහිපයක් ද ලියැ වී තිබෙනවා. අයිස් බේසම්වල බැස සිටීම වැනි ක්‍රියකාරකම් ඔහු නිතරම පාහේ සිදු කරනවා.
විම් හොෆ් පවසන ආකාරයට ඔහුට මේ ආකාරයට ශීතල විඳදරා ගැනීමේ හැකියාව ලැබී තිබෙන්නේ නිරතුරුව භාවනා කටයුතුවල නිරත වීම නිසා යි. කෙසේ නමුත් විද්‍යාඥයින් එය එක්වරම පිළිගැනීමට සූදානම් වූයේ නැහැ. ඔහු හොෆ් හා ඔහුගේ හැකියාවන් අරබයා පර්යේෂණ රාශියක් දියත් කළා. ඒවායින් ලැබුණු ප්‍රතිඵල පුදුම සහගත වුණා. ඔහුට සිය ස්වයංසාධක ස්නායු පද්ධතිය හා ප්‍රතිශක්තීකරණ පද්ධතියෙන් ලබාදෙන ප්‍රතිචාර බොහෝ සෙයින් පාලනය කර ගැනීමට හැකියාව තිබෙන බව එහි දී ඔප්පු වුණා. මෙය භාවනා තුළින් හිත එකඟ කර ගැනීමෙන් ලබාගත් ශක්තියක් බැව් තීරණය කෙරුණා. සරලවම පවසනවා නම් ශීතල පරිසර තුළ දී සිත එකඟ කරගෙන හොෆ් තමන්ට ශීතල දැනෙන්නේ නැතැ යි සිතනවා.
විද්‍යාඥයින් අදටත් හොෆ් ලබාගෙන ඇති හැකියාව ඉතා සුවිශේෂී එකක් හැටියට දක්වනවා. කෙසේ නමුත් ඔහුගේ සමට භෞතික හා රසායනික වශයෙන් දරාගත නොහැකි තරමේ අඩු උෂ්ණත්වවල අත්හදාබැලීම් සිදු නොකරන ලෙස ඔවුන් හොෆ්ට උපදෙස් දී තිබෙනවා. උදාහරණ ලෙස ඉහළ උෂ්ණත්ව දරාගැනීමක් සැලකුවහොත් සෙල්සියස් අංශක 55-60 වැනි උෂ්ණත්වයක් සිත එකඟ කර දරා ගැනීමේ දී සමට භෞතික හානියක් සිදු නොවූවත් සෙල්සියස් අංශක 80කට එහා උෂ්ණත්වයක දී සමේ පටක හානි වීමට පටන්ගන්නා නිසා එහි දී සිත කෙතරම් සමාධිගත කරගත්තත් එවැන්නක් දරාගෙන නොපිළිස්සී සිටීමට හැකි වන්නේ නැහැ.
Rate This Article
Thanks for reading: අධික සීතල විඳ දරාගත හැකි මිනිසා , Stay tune to get latest Blogging Tips.